मेरु अपहरण कु बारे मा् जो अफवा फैलणी छीं, वो सुणिकि समझम् नि आणू कि हैंसुण चा् कि रुण। आखिर मीं भी क्षेत्र कु छटियूं तिकडमी छौं, क्वी आंडू-पांडू इनी मिथै कनुक्वै किडनैप कैरि द्यालू। मि चुनौ कि थक मिटाणाकु बिलोक का दर्जनभर क्षेपंस पतियूंकु दगिडि भावी प्रमुखपति जी का नेतृत्व मा् गोवा टूर पर छौं।
ज्यांसे आरामकु दगिडि गोवा कु तर्ज पर गौंकु विकास कनु करण, समझ साकु। बाकी रै बात भावी प्रमुख पति से कुछ खर्चा पानी लीणाकि, त् चुनौ मा अपड़ी ब्वै का मै*7+₹ वोटरुल भि त् घाट-घाटकु पाणी पिलै दे।
जैकु मुख नि द्यखण चांदु छाय् वैकु क्या-क्या द्यखण पोड़ि, तुमतै क्या बतों। मुर्गा-दारू, ब्यखट्या, नगद नारायण लेकि भि कै हरामकु बच्चोंनु गद्दरि कै दे। वो तो भलु हो पीठासीन भैजिकु, कि वैन मेरि दियीं बोतलकि लाज राखि दे, अर भंड्या झांझम् ट्वटुकु ह्वैकि 55 मतपत्रूं पर वैन सैन ही नि करीं। निथर यून त् हमरु चुल्हु बुझाणाकु पूरु इंतजाम करि्यूं छौं, हमरि सैंणी रां&₹ त वखी ह्वै गे छै। अर इतगा पापड़ बेलिकी हमरि कीसिंद द्वी चार रुपिडि आणा भि छीं त्, कैकि पेटम् पीड़ा किलै।
अरे बिलोक आणि जाणि मा् भि त खर्च लगुदू। अर जतना मिललू उतुग मि गौं मा सपोड़ा-सपोड़ भि त् कम ही करुलु। त् खबरदार मि गोवा मा फैवस्टार होटलम् राजि खुशि छौं। क्वी मेरि खोजबीन ना कर्यां, भावी प्रमुख पति भैजि अर ऊंका च्यालोंकु खिलाफ रिपोर्ट ना लिखयां बारे, न्हा मि कैथे कोर्टम् घसीटु।
